Mro Ignazio Catania (1883 – 1884 / 1885)

Ignazio Catania, li kellu sehem importanti fir-ri-organizzazzjoni tal-Banda Unione, twieled Bormla fid-29 ta’ Jannar 1860 iben Ġiljan u Reġina German. Beda jistudja l-klarinett mal-Banda San Giorgio ta’ Bormla, biex wara sar wieħed mill-aqwa solisti. L-antiki kienu jinstemgħu jgħidu li kien jgħaxxaq lil kulħadd meta kien ikollu xi solo mal-banda. Kompla l-istudji mużikali u nħatar assistent surmast tal-Banda San Giorgio ta’ Beltu. Fl-1883 inħatar direttur tal-Banda Mannarino taż-Żurrieq u fl-istess ħin kien jgħallem il-mużika lill-allievi tal-istess banda.

Tul il-karriera tiegħu, mexxa diversi baned oħra fosthom is-San Leonardo ta’ Ħal Kirkop, De Paule ta’ Raħal Ġdid, Maria Annunziata ta’ Ħal Tarxien u Beland taż-Żejtun. Fost il-kompożizzjonijiet tiegħu hemm l-Innu Vi Salvi il Ciel Magnanimi, il-Polka La Rosa, il-mażurka San Giorgio a Mare u diversi valzers fosthom l-Otto di Dicembre, Due Ladri u Spasimenti. Miet f’Bormla fl-għomor ta’ 79 sena, fl-4 ta’ Awissu 1939.

Is-Surmast Carmelo Abela (1884 – 1885 / 1888 – 1889)

Is-Surmast Carmelo Abela, minkejja li ftit hawn tagħrif dwaru, kien fost l-aħjar mużiċisti ta’ tmiem is-seklu dsatax u l-bidu ta’ dak ta’ warajh. Kien magħruf għall-ħila li kellu fl-arranġament ta’ għażliet mill-Opri għall-banda. Tul il-karriera tiegħu, idderieġa diversi baned, fosthom din tal-Birgu, is-San Giorgio ta’ Bormla u hu meqjus bħala l-ewwel surmast tal-Banda San Ġorġ, ta’ Ħal Qormi. Konferma ta’ kemm kien persunaġġ influwenti fil-qasam mużikali hi li kien miegħu li kkonsulta l-kumitat tal-Banda La Valette meta ġew biex jaħtru surmast direttur ġdid. Aktarx li kien fuq parir tiegħu li fl-1889 kienu ħatru lill-Vincenzo Carabott

 

 

 

Is-Surmast Gaetano Grech (1889 – 1905 / 1909 – 1910)

Is-surmast Gaetano Grech, id-direttur ġdid ta’ din il-Banda, imlaqqam palazzi, iben Anġlu u Teresa Fiammingo, twieled l-Isla fid-19 ta’ Settembru 1855. Irċieva l-ewwel tagħlim fil-mużika għand zijuh Mro. Giorgio Fiammingo, billi tħarreġ fil-klarinett u l-vjolin. Kompla jistudja għand surmastrijiet oħra bħal Mallia Cassar u Paolino Vassallo. Bħala surmast direttur beda mal-banda ta’ beltu, dik il-ħabta msemmija La Vincitrice u aktar tard Queen’s Own. Tul il-karriera tiegħu minbarra l-banda ta’ din il-belt, kien surmast direttur ta’ diversi baned bħal La Valette u King’s Own, tal-Belt, l-Unione ta’ Ħal Luqa, San Giorgio ta’ Bormla u għamel xi żmien mal-L’Isle Adam tar-Rabat. Kien ukoll inħatar direttur onorarju tal-Banda Prince of Wales Own tal-Birgu u dderigieha f’okkażjonijiet partikulari. Insibuh ukoll direttur ta’ banda ġdida li, għal xi ftit żmien, ġiet iffurmata fil-Belt Valletta bl-isem ta’ Otto Settembre. Flimkien ma’ dawn kien għamel żmien ukoll iħarreġ baned militari Ingliżi.

Is-Surmast Alfred P.Hare (1905 -1906 / 1910 – 1912)

Fost il-kompożizzjonijiet numerużi tiegħu, jispikkaw is-sinfoniji Figlia del Re Pipino, Pensiero Melanconico u La Bella Melita. Kellu l-isfortuna li jmut meta kien qed jikkomponi l-ewwel att ta’ opra bl-isem ta’ Le Prime Crociate. Kemm dam il-Birgu, Mro. Grech kien stmat u maħbub ħafna. Dan jidher billi diversi drabi, kemm wara xi programm, kif ukoll waqt xi laqgħa fil-każin, mhux l-ewwel darba li kien jingħata rigali, li jkunu ġabru għalihom l-ammiraturi tal-banda. Fl-1905 ħalla lill-Banda Duke of Edinburgh biex ingħaqad ma’ dik ta beltu, l-Queen’s Own. Huwa miet fl-eta` ta’ 83 sena fl-1938. Ġie lura Malta fl-1903 u minn dakinhar ingħata d-direzzjoni ta’ diversi baned, fosthom il-King’s Own tal-Belt, id-Duke of Connaught ta’ Birkirkara, il-Prince of Wales Own tal-Birgu, La Stella ta’ Għawdex, il-Banda Pinto ta’ Ħal Qormi u l-Banda San Filep ta’ Ħaż-Żebbuġ. Il-kompożizzjonjiet tiegħu huma bla għadd, iżda l-aktar li jissemmew huma s-sinfonija Rex, il-marċ sinfoniku Flangar non Flector u l-innu A San Domenico. Kellu personalita` li biha kien jagħmel ħafna ħbieb u kien stmat ħafna. Kien jaf diversi lingwi u b’hekk, il-Gvern kien ħatru interpretu fil-Qrati Maltin. Sfortunatament, miet fl-1932, f’eta` mhux tant avvanzata, ta’ 67 sena u jinsab midfun fiċ-Ċimiterju tal-Addolorata. Is-Surmast Hare, li taħt il-bakketta tiegħu għaddiet il-Banda, twieled il-Belt Valletta fl-1865. Ħa l-edukazzjoni tiegħu fis-Seminarju tal-Imdina u ta’ 16-il sena beda jistudja l-mużika F’dan il-qasam mexa ‘l quddiem ukoll u wara li rebaħ scholarship mar kompla l-istudji tiegħu fil-Conservatorio Musicale San Pietro a Majella f’Napli. Hawn kompla jagħmel progress għax ta’ 20 sena kien ġa sar direttur tal-Banda ta’ Posillipo. Wara li xi kompożizzjonijiet tiegħu ġew eżaminati minn surmastrijiet magħrufa bħal Rossi u Falcone, ġie ċertifikat li huwa kien laħaq livell għoli biżżejjed li sar eliġibbli li jinħatar direttur ta’ kwalunkwe banda. Fl-1885 mar l-Indja fejn inħatar direttur ta’ diversi baned, fosthom uħud militari. Hemm baqa’ msemmi għal kunċert li kien għamel ma’ banda komposta minn 200 bandist.

Mro. Durante Magri Grech (1906 – 1907)

Is-Surmast Durante Magri Grech kien direttur dixxiplinat. Ma setax jonqos għax kien raġel tas-Servizz. Wara li temm l-istudji mużikali, kien ingaġġa bħala suldat fir-Royal Malta Militia Regt. u ftit wara ġie promoss surġent u maħtur surmast direttur tal-banda tar-reġiment. Meta ngħata t-tmexxija tal-Banda Duke of Edinburgh kien assistent ta’ Hare mal-Banda King’s Own. Jista’ jkun li l-ħatra tiegħu fil-Birgu waslet wara rakkomandazzjoni ta’ Hare innifsu.

L-aħbar li ngħatat mill-ġurnal imsemmi kienet xi ftit tard għax lil Magri Grech ġa nsibuh fid-direzzjoni tal-Banda fiż-żewħ programmi li għamlet f’Misraħ San Ġakbu f’Ħaż-Żabbar, fl-okkażjoni tal-festa tal-Madonna tal-Grazzja, fit-8 u d-9 ta’ Settembru. Dakinhar, Magri Grech introduċa fil-Banda il-passio doppio, li qatt qabel ma jidher li kien interpretat fi programmi preċedenti. L-ewwel wieħed kien l-Orientale ta’ Ferradini.

L-istess żewġ programmi li għamel Ħaż-Żabbar irrepetihom ġimgħa wara fil-festa ta’ San Duminku fil-Birgu, iżda kien żied il-polka Margherita ta’ Vella u għażliet minn La Maritana ta’ Wallace, it-tnejn ġodda għall-Banda Duke of Edinburgh. Aktarx iva milli le, dawn iż-żewġ programmi f’San Duminku kienu l-aħħar programmi tiegħu ma’ din il-Banda.

Id-direzzjoni ta’ Magri Grech, jidher li ma kenitx destinata li ddum wisq. Huwa kien ingħata l-kariga fi żmien meta għadd ta’ baned Maltin kienu laħqu livell għoli ġmielu. Minħabba l-piki li kien hemm bejniethom, l-ammiraturi ta’ wħud fosthom kienu lesti jagħmlu sagrifiċċji mhux żgħar biex jaraw li l-banda favorita tagħhom, kemm jista’ jkun, tilħaq il-perfezzjoni. Biex jilħqu dan il-għan, bdew jaħtru surmastrijiet diretturi barranin.

Mro. Giovanni Giumarra (1907 -1909 / 1912 – 1924 / 1930– 1936)

Fost is-Soċjetajiet li xtaqu surmast barrani kien hemm dik tad-Duke of Edinburgh. Xewqithom inqagħtet meta fi tmiem l-1906 wasal Malta l-Isqalli Giovanni Giumarra biex jieħu d-direzzjoni tal-Banda minflok Magri Grech. Is-surmast Giovanni Giumarra twieled f’Comiso, Sqallija, fl-1861, iben Vincenzo u Annunziata Baglieri. Il-ġibda tiegħu lejn il-mużika dehret kmieni u ta’ 12-il sena kien ġa wera l-potenzjal tiegħu. Wara suċċess f’eżami li kien qagħad għalih, inħatar surmast sostitut u klarinettista solista mal-banda ta’ Sortino. Ftit snin wara, insibuh viċi-direttur u aktar tard direttur tal-banda tal-Muniċipju ta’ Noto. Kemm dam direttur tagħha, din il-banda għamlet progress kbir, tant li bdiet tkun mistiedna tagħmel programmi tul is-sena kollha, kemm fil-festi u kemm f’okkażjonijiet oħra.

Ħalla bosta kompożizzjonijiet li fihom wera finezza mhux komuni. Dawn kienu kemm sagri kif ukoll profani. Bosta minnhom ġew stampati minn ħafna djar tal-mużika. Barra minn dan, il-mijiet ta’ marċi, sinfoniji, intermezzi u kompożizzjonijiet oħra tiegħu kienu ferm imfittxija, kemm fl-Ewropa kif ukoll fl-Amerika u l-Afrika. Fi tnejn mill-aħħar kompożizzjonijiet tiegħu wera l-ġibda li kellu lejn il-Birgu. Ir-Recordare iddedikaha lill-Kapitlu tal-Kolleġġjata u Ai Caduti del 1565 kien iddedikaha lin-nies ta’ din il-belt.Minbarra mad-Duke of Edinburgh, Giumarra għamel xi żmien mal-Banda Vilhena tal-Furjana, San Giorgio ta’ Bormla u mal-Banda Leone, tal-kapitali Għawdxija, fejn kien stmat ħafna u magħha għamel 10 snin sħaħ. Kien imħarreġ sewwa fl-istrumentazzjoni għall-baned u bħala kunċertista dejjem impressjona waqt kunċerti li dderieġa fit-Teatru Rjal, fil-Manoel u fiċ-Circolo Brittania.

Is-suċċessi tiegħu f’konkorsi mużikali internazzjonali li daħal għalihom juru kemm kien mużiċista kapaċi u fihom rebaħ diversi unuri. Biżżejjed insemmu tnejn fosthom, meqjusin bħala mill-aktar prestiġġjużi. F’konkors li kien sar f’Palermo, ħa diploma tal-Ewwel Grad u Midalja tal-Fidda u f’ieħor f’Salerno rebaħ Diploma tal-Ewwel Grad u Midalja tad-Deheb. Wara 29 sena fix-xena bandistika Maltija u Għawdxija, Mro. Giumarra miet il-Ħamrun f’lejlet il-Milied tal-1936.

Is-Surmast Paċifku Scicluna (1924 – 1925 / 1927 –1930 / 1936 – 1952)

Is-surmast Scicluna twieled Bormla fl-14 ta’ Awissu 1876. Wara ftit xhur, il-familja Scicluna marret toqgħod il-Birgu, fejn Paċifku trabba u għex sa mewtu. Beda jistudja l-mużika ta’ 9 snin fil-Birgu mal-Banda Unione tal-istess belt u ħareġ idoqq ftit wara bħala katubier u aktar tard qaleb għall-klarinett. Kompla l-istudji tiegħu taħt is-surmastrijiet Catania, Abela, Ricci, Doncich u Grech.

Fl-1903, ta’ 27 sena, kien inħatar surmast direttur tal-Banda Maria Mater Gratiae, ta’ Ħaż-Żabbar. Magħha kien surmast erba’ darbiet u b’kollox baqa’ fid-direzzjoni tagħha għal 29 sena sħaħ, sakemm irtira fl-1951. F’Awissu ta’ l-1906, ġie konfermat surmast direttur tal-Banda Prince of Wales Own tal-Birgu, fejn baqa’ sa Frar 1914. Huwa kien ukoll direttur tal-banda Żebbuġija De Rohan, San Giuseppe tal-Imsida, Victoria tal-Mellieħa u snin twal mal-Banda Duke of Edinburgh, ta’ din il-belt. Għamel xi żmien impjegat ukoll bħala bandmaster mal-Flotta Ingliża.

Kien hemm okkażjonijiet meta dderieġa l-baned San Giorgio ta’ Bormla, Unioneta’ Ħal Luqa u l-King’s Own tal-Belt. Kien ukoll direttur ta’ Orkestri Mandolinistiċi fl-Isla (1907), orkestra oħra bħala fergħa tal-Banda Prince of Wales tal-Birgu (1909) u kien isemmi oħra fl-istess belt li twaqqfet fl-1904. Għallem ħafna żgħażagħ u bihom kien ifforma banda mdaqqsa bħala fergħa fi ħdan il-Banda Duke of Edinburgh.

Mro. Scicluna ħalla kompożizzjonijiet ta’ kull xorta, bħal sinfoniji, valzi, marċi u innijiet. Fost dawn ta’ l-aħħar hemm is-Salve Maria Salve għal Ħaż-Żabbar, l-Ave Maria magħrufa bħala tal-fanfarra, l-Inno all’Assunta għal Ħad-Dingli u l-Inno a San Domenico, magħruf fil-Birgu bħala l-Innu l-Kbir. Artz kellu ammirazzjoni kbira lejh. Minbarra li ħallielu ċertifikat mill-aqwa bil-miktub, li għadu konservat fil-każin, meta kien għadu kif wasal hawn u rah jidderieġi lill-Banda kien instama’ jgħid: X’kien jinħtieġ li ġġibu surmast meta għandkom raġel hekk ta’ ħila!

Huwa kien ħalla speċi ta’ Memorji, illum ħafna minnhom intilfu, dwar il-formazzjoni mill-ġdid ta’ din il-banda fl-1883, u ġrajjietha f’dawk is-snin ta’ taqlib, kif isostni l-istoriku Lorenzo Zahra. Wara ħajja eżemplari, Paċifku Scicluna miet ta’ 81 sena, fl-20 ta’ Settembru 1957.

Mro. Carl Maria Artz (1925 – 1927)

Mro. Carl Maria Artz twieled f’Dusseldorf, il-Ġermanja fl-1887. Ħa l-ewwel tagħlim tiegħu fl-arti mużikali f’din il-belt meta kien għadu żgħir u kompla jipperfezzjona f’din l-arti wara li beda jistudja wkoll il-pjanu fi Dresden, Liepzig u Munich. Fl-istess ħin, kompla jitħarreġ fil-kompożizzjoni u d-direzzjoni għand l-aħjar professuri ta’ dak iż-żmien, fosthom Felix Draesecke, ħabib u kollega ta’ Listz u Wagner.

Sa mill-bidu nett, permezz tal-għadd ġmielu ta’ kanzunetti mill-isbaħ, kompożizzjonijiet għall-pjanu u musica da camera Artz wera ħila mhux komuni. Aktar m’għadda żmien, aktar dehret ħiltu meta bdew jinstemgħu is-sinfoniji għall-orkestra u magħhom ukoll xi opri teatrali li beda jikkomponi. Ħiltu fid-direzzjoni dehret minn kmieni, għax ta’ 22 sena kien ġa dderieġa l-aqwa orkestri sinfonici ta’ diversi bliet Ġermanizi, fosthom dawk ta’ Liepzig, Dresden u Munich. Fl-1913, ta’ 26 sena inħatar direttur tal-famuża orkestra filarmonika tal-kapitali Berlin, fejn baqa’ magħha sa l-1919. Lil din l-orkestra dderiġieha fl-aqwa sinfoniji ta’ Richard Strauss: l-Alpensinfonie u ż-Zarathustra. Il-Banda Duke of Edinburgh kisbet successi kbar taħt it-tmexxija ta’ dan il-bravu Surmast. Huwa miet ta’ 76 sena f’Berlin fil-21 ta’ Lulju 1963.

Mro Hector Dalli (1952 – 1980)

Mro.Dalli ikkompona għadd ta’ sinfoniji, marċi, kemm brijużi kif ukoll funebri, u għadd ta’ innijiet, fosthom dawk ta’ din il-Banda u dak ta’ San Lawrenz, magħruf bħala il-kbir għal kor, tenur u baxx, esegwit għall-ewwel darba lejlet il-festa ta’ San Lawrenz iċċelebrata fl-1972. Minbarra lil din il-Banda idderieġa baned oħra, fosthom il-Banda San Ġużepp tal-Ħamrun, Leone ta’ Għawdex, Queen’s Own tal-Isla, il-Banda tat-Tarzna, u l-Banda tal-Moviment tal-Ħaddiema. Lil-din il-Banda Vittoriosana, li fi żmienu nbidel isimha, mexxieha għal 28 sena sħaħ: mill-1952 sakemm miet fl-1980.

Is-surmast Hector Dalli twieled iż-Żejtun nhar it-18 ta’ Ġunju 1914, iben Ġużeppi Marija u Evanġelista Mercieca. Flimkien ma’ Hector, dawn kellhom erba’ wlied oħra. L-ewwel tagħlim mużikali Hector, flimkien ma’ ħutu subien, ħadu mingħand missieru, li kien mużiċista mill-aħjar, tant li kien ingħata t-tmexxija tal-Banda Żejtun wara l-firda li seħħet fil-Banda Beland. Ta’ 9 snin Hector Dalli kien tħarreġ bil-flicorno u wara qaleb għall-kurunetta mal-Banda Beland. Kien idoqq tajjeb ukoll il-pjanu.

Iżda ma waqafx hawn, għax kompla jitħarreġ fl-armonija, il-kontrapunt, l-istrumentazzjoni u d-direzzjoni għand is-Surmast Ġużeppi Casapinta, biex ftit wara nħatar Assistent Surmast tal-Banda Żejtun. Waqt li kien f’din il-kariga, kompla l-istudji mużikali u ta’ 25 sena kellu suċċess kbir fl-Eżami tat-Teorija Mużikali tal-London College of Music li fih kien ġab 91 marka minn 100 u kiseb l-ewwel post biex iggradwa A.Mus.L.C.M. Mro Hector Dalli baqa’ sejjer ukoll sabiex laħaq Surmast tal-Banda Beland, fejn dam ukoll fil-kariga sakemm miet.

Mro. Paul Schembri (1980 – 2015)

Is-surmast Paul Schembri M.I.S.M. M.I.W.M. twieled Ħal Luqa nhar it-13 ta’ Frar 1931, iben Joseph u Maria Carmela nee’ Costa. Huwa dixxendent ta’ mużiċisti gwappi. Missieru kien vjolinista prim u nannuh kien baritonu fit-Teatru Rjal. Minn ċkunitu wera ġibda kbira lejn il-mużika u beda l-ewwel studji tiegħu f’din l-arti mal-Banda Sant’Andrija ta’ raħal twelidu. Hawn għamel progress mhux żgħir, għax ta’ 12-il sena kien daqq fil-pubbliku l-kompożizzjoni, mhux tant faċli, Un Concerto per Euphonium. Kompla l-istudji avanzati mużikali tiegħu taħt is-surmastrijiet Anton Muscat Azzopardi u Profs.Henry Galea.

Kien ingħaqad mal-Banda King’s Own u ftit wara sar is-solista tagħha fuq l-Euphonium u aktar tard, assistant surmast tagħha. Minbarra surmast direttur tal-Banda Vittoriosana San Lawrenz u l-Banda Sant’Andrija, għamel żmien surmast direttur tal-Banda Melita tal-Imsida, Duke of Connaught ta’ Birkirkara, Santa Marija tal-Qrendi u r-Royal Air Force Band (Malta). F’diversi okkażjonijiet, idderieġa wkoll baned Ingliżi u Skoċċiżi, fosthom il-Musselborough Trades Brass Band ta’ East Lothian, fl-Iskozja.

Mro. Schembri hu miżmum bħala wieħed mis-surmastrijiet diretturi ta’ ħila, kif ukoll kompożitur mill-aħjar. Għandu aktar minn 200 kompożizzjoni, fosthom marċi kemm brijużi kif ukoll funebri, valzi, sinfoniji u innijiet. Fost dawn jispikkaw il-fantasija Centenaria, is-sinfonija Chiara, l-overture Canena, il-marċ sinfoniku Deborah u s-sonatina La Tromba Magica. Kompożizzjonijiet li ħarġu minn taħt idejh jinsabu wkoll barra minn Malta, bħar-Renju Unit, il-Kanada u l-Awstralja.

Fl-1982, il-fantasija Centenaria kienet iddaħħlet f’kompetizzjoni ta’ mużika f’Londra u kienet rebbħitu Diploma of Merit. Għal ġmielha kienet laqtet ħafna lill-kompożitur magħruf Andrew Lloyd Weber, li kien jifforma parti mill-ġurija. Is-Surmast Paul Schembri ser jispiċċa mid-direzzjoni tal-Banda fis-sena 2015 minħabba raġunijiet ta’ saħħa.

Mro Jonathan Abela (2015 –)

Mro Jonathan Abela twieled fis-16 t’April tal-1972 u huwa iben Carmelo Abela u Mary Abela nee Brown. Huwa twieled il-Pieta` u tgħammed fil-Parroċċa ta’ San Lawrenz ġewwa l-Birgu. Fl-ewwel snin huwa kien joqgħod ġewwa Triq La Valette fil-Birgu. Aktar tard il-familja tiegħu mxiet lejn Ħaż-Żabbar. Jonathan huwa miżżewweg lil Lorraine Abela nee Grech u għandhom żewġt itfal, Luke u Gabriel. Meta żżewgu huma marru joqogħdu l-Kalkara, fejn għadhom joqogħdu hemm sal-lum. Jonathan huwa uffiċjal taċ-Ċivil u bħalissa qiegħed jaħdem fis-sezzjoni tat-Teknoloġija tal-Informatika fi ħdan il-Ministeru tas-Saħħa u l-Enerġija.

Jonathan beda jistudja l-mużika fl-eta` ta’ sbatax il-sena taħt Mro. Ray Sciberras. Wara ħdax il-xahar ħareġ idoqq is-slide trombone mal-Banda Maria Mater Gratiae ta’ Ħaż-Żabbar. Fl-istess żmien beda jistudja t-tejorija mużikali taħt l-istess Surmast. Wara sitt snin studju fit-tejorija mużikali fejn għadda mill-grades kollha, fl-1997 għadda wkoll mid-diploma A.Mus.LCM. Sadanittant, huwa baqa’ jistudja is-slide Trombone taħt diversi surmastrijiet oħrajn.

Bis-Slide Trombone, Jonathan daqq ma’ diversi orkestri, baned u gruppi oħrajn. Fosthom daqq mal-Orkestra Nazzjonali li kienet taħt id-direzzjoni ta’ diversi Surmastrijiet barranin. Daqq ukoll mal-Orkestra ta’ Dun Ġwann Galea, l-Orkestra tal-Amadeus Choir tat-tenur Brian Cefai, u l-Orkestra ta’ Dion Buhagiar fost oħrajn. Filwaqt li l-programmi mużikali ma’ diversi baned Maltin ma naqsux, Jonathan daqq ukoll ma’ diversi bands u f’diversi kunċerti oħra fosthom: Tejatru Unplugged mal-band ta’ Renzo Spiteri kif ukoll mal-Bands Fakawi u Brikkuni. Kien ukoll membru fiss fil-Band Etnika li għamlet suċċess kemm f’Malta u kienet mistiedna kemm il-darba biex iddoqq barra minn xtutna. Ħa sehem ukoll f’diversi Musicals u Pantomimi fosthom Chicago, Peter Panto u Living Legends. Daqq ukoll ma’ diversi Big Bands fosthom il-Johan Strauss Big Band taħt it-tmexxija ta’ Paul Abela li kienet ħadet sehem ukoll fil-Malta Jazz Festival, mal-Val Valente Big Band, kif ukoll mal-Freddie Mizzi Big Band. Jonathan kemm il-darba ta is-sehem tieghu ukoll fil-band tal-kor Voices. Riċentement huwa ħa sehem fil-kunċert li tellgħet l-orkestra tal-PBS ġewwa t-tinda f’Ta’ Qali. L-orkestra kienet taħt it-tmexxija ta’ Mro Paul Abela u taħt it-tmexxija tal-kuġin tiegħu Mro Joe Brown. Fis-26 ta’ Diċembru tal-2014, Jonathan reġa’ ingħaqad ma’ Mro Joe Brown fil-programm li sar b’risq il-ġbir ta’ fondi għall-Istrina fuq l-istazzjonijiet tat-televiżjoni Maltin. Jonathan idoqq ukoll il-Bass Guitar.

Jonathan inħatar Assistent Surmast għall–ewwel darba mal-Banda San Ġużepp tal-Kalkara. Aktar tard huwa nħatar ukoll Assistent Surmast mal-Banda San Bartilmew tal-Għargħur, il-Banda San Girgor Sliema u aktar tard mal-Banda Beland taż-Żejtun. Kien ukoll għalliem mal-Banda Maria Mater Gratiae ta’ Ħaż-Żabbar. Fl-2004 inħatar Surmast Direttur tal-Banda San Ġużepp tal-Kalkara, kariga li għadu jokkupa sal-lum. Tul dawn is-snin, Jonathan idderieġa diversi programmi Mużikali mal-Baned li fihom kien jokkupa xi kariga. Jonathan ikkompona diversi Marċi brijużi u funebri, Valzi, Innijiet u arranġamenti oħra għall-banda. Huwa ikkompona ukoll tliet Tone Poems għall-Banda. Siltiet mill-aħħar Tone Poem li kkompona indaqqu ukoll waqt l-audition li saret għall-għażla ta’ Surmast Direttur tas-Soċjeta` Mużikali San Lawrenz tal-Birgu.